| |
Wennda früher wos erlaab wollst, hossda nei’n Zirguss, off’s Volksfest odder off'n Fußballplatz gemüsst. Wenn da heutzutooch amol richdich wos erlaab wisst, musst da dir n Termin bei’n beschtimmta Aachaoorzt in Neuscht läss gaab. Do konnsta wos erlaab! Bei mir woorsch neulich widder amol so weit und ich sooch euch ees: wenn da noch drei Stonn widder aus derra Schbrechstonn gässt, hossda mehr erlabbt wie süsst in a ganza Woche! Du künnst natürlich mit'n Termin zu a bestimmda Zeit und gässt ach diszibliniert bünktlich dürrt hie. Wie da nochert owwer die Warteschlange scho vuur die Empfangsdeege sisst, grichsta n erschta Vuurg'schmagg drauf, wos dich gleich erworrt. Biss da dein Stehplatz naawa die annera g'fühlt 50 Patiente, die alle anscheinend n gleiche Termin hömm wie du, eigenomme host, bissta die erschta 10 Euro für die Braxisgebühr los und musst dazu noch aufbass, dässda net of a kless Kind dreddsd odder zumindest n Legoturm vo ees vo die klenna Ragger ömmdreddsd. Aus fönnef verschiedene Wartezimmer blärra die düchticha Schbrechstunden¬höllferinna die Nooma vo die, wo droo komma und in dann ganze Durchenanner gätt's schlimmer zu wie in München of n Stachus. A Oktoberfestbedienung hodd n Draumdschobb geechaüwer so a Meedla! Zum drettamol während du off dein Stehplatz mit grössa (grange) Aache dem lusticha Dreiben zuuguggst, muss der Frau Müller oder der Frau Schmitt erklärt wär, däss der Aachadrugg jetzt nixmer ömsuust gemessa würrd, sondern so a Messung jetzterd 16 Euro kosst. Und am End mussta scho ball lach, wenn die Frau Müller - wenn sess no endlich kabiert hodd - seecht, däss mer die Messerei no liewer sei läss söll. Laufend müsse Leut, wo n Sitzplatz hömm, aufstääh, weil irchend a noch so kurze Vuuruntersuchung vuurgenomma würd und wenn sa noch a hallwa Minudda widder komma, iss ihr Sitzplatz furrt. Bissa no endlich n Oorzt zu G'sicht griecha, hömmsa sich dermaßen aufgereecht, däss der Oorzt staunt, worömm ihr Aacha so rood unterlaffa senn. Und Daadsach iss: wenn da berufstätig bist und oo a Schmiedebress odder a Stanzmaschine schaffst, fräästa dich wie a Schneeköönich, wenn da nooch dein Aachaorzttermin endlich widder no dei Maschine döffst und dich die restlicha sechs Stonn von Dooch vo dann Dumuld beim Aachaorzt erhool konnst. Servus, der Eustach. |
