| |
Mir is aufg’falle, däss sich zwee wichtiga Institutione in unner G’sellschoft, die mer irchendwie mitanannner vergleich konn, allerweil dodaal auseranner entwiggeln: die Pforr unn die Fußball-Schiedsrichter. Früher worrn allezwee ömmer nur schwoorz oogezoocha. Doss hodd sich bei die Pforr owwer ach scho geändert, bei die Schiedsrichter sowiesoo unn is jo aach nedd weitersch schlimm. Wie owwer allgemein bekannt sei döffed, werrn zur Zeit üüwerool in unner Geechend Pfarreiengemeinschoffde gegrünnd, wos jo hie und do, zum Beispiel in Wollbach-Mitte, scho zu hefftiche Reagzione g’führt hodd. Die Pforr lange hald hinna und vurrn nixmer aus, ömm alle Dürrfer zu besetza und wenn mer die villa tüchticha Pförrlich aus Indien odder Boolen nedd hädda, dääds noch viel schlechter aussäh. „S künnd noch soweit“, hodd der Gotthold treffend gemeeent, „däss der Pforr ner blooß noch die Däff, die Hochzich und die Beerdichunga mecht und soo vo een Dermin zum annere hetzt, weil ömmer in ees vo sei sechs bis ocht Dürrfer a Kind gedäffd weer söll, zwee heier wella oder eewa eener stirbt. Domit bist du no als Pforr mehr wie genuch ausgelassd! Und wie ich neulich widder amol a Fußballspiel in’s Fernseh oogeguckt hobb, woor ich erschrogga, wie ich bei doss Spiel insgsammd sechs (!) Schiedsrichter gezählt hob! Eeener als Scheff mit die Pfeuffa, zwee oo die Linie mit die Fahne (gidds jo in die Kirch bei die Pforr aach), eener wo die Auswechslunga und die Noochspielzeit oozeicht (söllert mer in die Kirch aach endlich eiführ) und neuerdings zwee, wo ner blooß bei die Toore stänn und gucka, ob der Bool hinner die Linie woor odder nedd. Verröggt! Sechs Schiedsrichter bei ee Fußballspiel – und mir grünnda ee Pforreiengemeinschoffd nooch die anner! Do bassd doch wos nixmer zomm! Und worömm gidd’s so viel Schiedsrichter und so weenich Pforr? Richtich! Weil die Schiedsrichter heier döffa und sich domit furrdgepflanz könna! Ganz eefoch! Und die Pforr halt nedd, wache n Zölibat. Wobei ich neulich eine hochinderessande Definition von Zölibat gelasst hob: „Der Zölibat ist eine kirchliche Einrichtung, die es katholischen Priestern ermöglicht, ohne Frau zu leben und das als Verzicht auszugeben.“ Owwer wenn doss stimm dääd, müssde mer jo ächendlich zu viel anstatt zu weenich Pforr hobb! Servus, der Eustach. |
