| |
Jetzt woor doch der Bundesaußenminister Frank-Walter Steinmeier n vergangene Freitich tatsächlich in Ostheim und hot die Bionade besücht! Wohrscheinlich woor er jo als Kanzlerkandidat vo die SPD do, ower Tatsach is, däss er mit sei gebanzerde - passend zu sei Ziel - Limosine do wor. Leichtsinnig! Ower wieso grod der Außenminister? Is der vielleicht für die Flöschlich unn die Etiketta vo die Bionade und der Innenminister für die Limonad inna dinn zuständig? Und woröm is net der Verteidigungsminister komma, wo sich doch die Bionade ständig geecha Angriffe vo Coca-Cola verteidich muss? Oder der Wirtschaftsminister zu Guttenberg, wo die Bionade doch vorwiegend in die Wirtschoft getrunka würd? Und wos is mit unner G'sundheitsministerin, die Schmidts Ulla, weil die Bionade doch so g'sund is? Die hot wohrscheinlich widder net gewösst, mit wos für a Auto sie komm söll. "Seid dos mit’s Dienstauto vo die Ulla Schmidt in Spanien rauskomma is, konn ich kee Nocht mer ruhig g’schloff!“, hot do der Gotthold gejommert. „Wieso denn dos?“, hob ich g’freecht. „No ja, ich hatt vur ung’fahr 15 Johr amol n Bulldogg von Maschinaring zum Aggern geburcht. Domit hatt ich nochert jo praktisch n Dienstbulldogg g’hoot, den annera mitfinanziert hömm, hob owwer no, weil unner Auto kaputt woor, mit dann Bulldogg mei Fraa zum Eikäffa of Neuscht g’forrn. Jetzt hob ich Angst, däss dos rauskünnt!!“, hot er ganz zerknirscht gebeicht. Es hot owwer aach der Deifel g’senn! Wenn mer überleecht, wos Strauß, Kohl und Konsorten in ihr Glanzzeit wohrscheinlich alles für Dinger gedräht hömm, muss mer feststell, dässes die Bollidigger vo heut nedd grood leicht hömm. Wenn zum Beispiel unner Innenstaatssekretär Dr. Weiß mit sei Dienstauto vo München of Mellerscht zu’n Termin nei die alt Kaserrn’ föhrt und n Abstecher hemm of Bahra mach well, ömm sich a friisch Hemm noo zu ziecha: döff er do mit’s Dienstauto vo die Autoboh nooch Bahra obbieg oder muss er sich dos friisch Hemm vo sei Fraa mit sei Privatauto off'n Bendlerparkplatz breng läss und sich dürrt oo Ort unn Stell ömmziech? Froocha üwer Froocha. Ich schloff zur Zeit aa net grod gut. Ich hob vuur vier Johr bei’n Sportvereinausflug of Liechtenstein 5 Euro nei n Opferstock vo a besichtichte Kirch in Vaduz gedönn und grüübel seit Zumwinkel drüü, ob ich dos nedd s Finanzamt müss meld hätt. Servus, der Eustach. |
