| |
Neulich hobb ich mir widder amoll Gedanke üüwer woss gemocht, woss außer mich wohrscheinlich keen intressiert: a Geldschein-Karriere. Nahm amoll n ganz normale 10 € - Schein. Er licht zum Beispiel n Mondichfrüh in Ingolstadt in die Kass vo a Metzgerei. N Seehofer sei Fraa künnt, käfft Laawerkaas für ihrn Horst, bezohlt mit 20 € unn gricht ihn raus. Der Horst nimmt unnern Schein mit nein Landdooch und bezohlt dürrt in die Kantine n Kaffee. Unner Abgeordneter Steffen Vogel künnt nei, holt sich a Snickers und grichtn als Wechselgeld raus. In n Geldbeutel von Steffen Vogel künnt unner 10 € - Schein s erscht moll in unnern Landkreis. Der Steffen Vogel iss middn Landrood Habermann in Worchelshause (wo süsst?) off a CSU-Versammlung, bezohlt a alkoholfreis Weizen (er muss noch fohr) mit unnern Schein, den der Habermann raus gricht, wie er sei vier Schoppe (der Chaffeur iss dabei) middn 50 € - Schein bezohlt. Der Landrood gädd n nächste Dooch naufn Kreuzberg nei die Kirch und dudd unner Schein nein Klingelbeutel. Die Schänk voss Klösster künnt und wechselt klee Geld in n Klingelbeutel. A junger Moo vo Brend käfft sich in die Schänk a Mooß Bier, bezohlt mit 20 € und gricht unnern Schein zurück. Dehemm in Brend gädd er in die Abbodeeg (hodd Notdienst) und käfft sich mit unnern Schein a Beggla Verhüterlich. Doss iss a Karriere, hä? Noch a boor Stunn vurharr vonn Landroot persönlich offn Kreuzberg voller Inbrunst nein Klingelbeutel gschmesse, wärrn jetzt Pariser mit gekäfft! Schlimm, odder? Egal. N Landrood sei Fraa gädd nei die selb Abbodeeg und holt Aspirin für ihrn Dommas. Die fönnef Schoppe vo Worchelshause ....... Jetzt hoddn der Landrood widder. Iss jo fast wie „Schworzer Bädder“! Der Habermann iss die Woche drauf in Berlin, korrd in die Bayerisch Landesvertretung middn Seehofer Schoofkopf und verliert genau 10 €. Unnern Schein! Der Seehofer reist zurück nooch Ingolstadt, gidd sei Karin Haushaltsgeld, fein gstüggeld in 10 € - Scheine, und ihr wösst, woss jetzt künnt. Die Seehofers Karin gädd nei die Metzgerei und käfft .............. Naa! Falsch! Nedd scho widder Laawerkas, sonder Rotgeleechtn. Kee Wunner, däss unner Schein kee Woche später bein Siichmar Gabriel inn Geldbeutel land. Worömm? Koalitionsverhandlunge. Langweilig. Schoofkopf. Alles gloor? Servus, der Eustach. |
