| |
So, die Kirmes iss jetzt so langsam ower sicher üüwerool aach widder römm. Kirmes! Irchendwie a schönns fränggisch Wurrd unn a herrlichs Fest! Früher mehr wie heut. Kirmes wor süsst eene vo die weniche Wochenenden ins ganz Johr, wo die Leut amoll nei die Wirrdschofd zum Esse senn. Heut leiste sichs vill fast jeden Sonndich. Odder sie hole sich irchendwo in a Pizzeria odder bei a Döner-Bude woss zum Midnehme. Stell dich amoll n Sonndichoowerds so n sechs Uhr mit dei Auto in die Näh vo a Pizzeria unn beobacht, woss do obgedd. Duschur komme Leut, parke, genn nei unn komme mit ganze Stapel oo viereggede Kartong widder raus. Zum Teil senns die reisnte Schonglierkünstler, die die Kartonstapel in a artistische Meisterleistung vo die Pizzeria zu ihr Auto transportiern. Unn dann gedds hemm unn würd gspeist. Döner-Bude, McDonalds, Pizzerien, Subways unn wie se alle hässe. Üüweroll jedes Wochenend s selb Schauspiel. Schlecht iss die Idee nedd, weil wenn mer dehemm in sei gewohnt Umgebung isst, konn mer sich ganz annersch verhalt wie in a Wirrdschofd. Mer muss sich nedd groß zurecht mach, konn gerülps, römmgeblärr wie merr well unn wenn mersch vo die Fraa aus döff, zegor eene gerauch. Unn s Bier zu die Pizza iss a deutlich billiger wie in die Kneipe. Nur die Essensauswohl passt mir nedd so richtig. Und do iss mir neulich a Gschäfdsidee komme, die garantiert funktionier dääd unn of die sogar ältere Leut wie der Gotthold unn ich oospring dääde! „Ripple to go“! Doss wäärsch! Nix mit Pizza, Döner, Hamburger unn doss neumodisch Zeuch! Stellt euch amol vuur, a Wirdschofd dääd Ripplich mit Kraut, Klössbrogge mit Äär, Bohnegemüs mit Klöss odder Mahlklöss mit Gurkezelood ausfohr unn neis Haus liefer. Doss dääd renn! Hunnerdbrozendich! Bei a grössersch Fest wär aa noch a glenns Fässle Kreuzbergbier dabei unn der Genuss wär komplett! Wells jemand mach? Ich dääd mich frää. Unn die Jugend wär a begeistert. Jetzt fällt merr grod ei, dässes Essensoolieferung mits Auto für ältere Leut jo scho gidd. Mir fällt bloß grod nedd ei, wie merr dezu seechd. Egal. Stell ich zum Schluss noch a Scherzfrooch, vielleicht fällt mirs denoch jo noch ei: Wie sooche Katze zu Mäus off Rollschüh? „Essen auf Rädern!“ Ja, genau, so hässds! Also, wenn sich der Erscht a „Ripple to go“ bestellt, nahmt ees mehr unn ruft mich oo. Ich komm! Servus, der Eustach. |
