Glosse

Seit Oktober 2007 schreibe ich für die Main-Post die Glosse "Gotthold & Eustach" und beleuchte dabei verschiedenste, meistens ganz aktuelle Themen, mit der ganz besonderen Sichtweise von Gotthold und Eustach. Die Glosse erscheint alle zwei Wochen jeweils am Dienstag in der Bad Neustädter Ausgabe der Main-Post. Besucher unserer Internet-Seite können alle Glossen nachlesen.


Guude Gschäffde Mundart

(21.08.2018)
 

Ömm irchendwoss, woss merr of Oohieb nedd verstedd, letztlich doch zu kabbiern, bedient merr sich nedd selten n Vergleich. Der hinkt zwor nedd selten, ower a Körnle Woored iss oft doch droo. Ich browiersch eefoch amoll. Johrelang seecht merr zu die Autofohrer, dässe joo nix sauf sölle, bervur se fohrn. Merr beschreibt eindringlich, wie gfährlich doss iss, abbeliert oo die Vernunft unn wunnert sich trotzdem fast jeden Dooch, wenn mer in die Zeitung lassd, däss widder eener besoffe derwöscht wurrn iss. Irgendwenn resigniert merr und stellt fest, däss jo doch alles nix nützt. Merr entschärft Kurve, mecht Baame wagg und stellt am End goor solarbetriebene Kühlschränk mit Freibier no die Ströss, däss sich die Blaumänner unn –frauen hinnersch Steuer bedien könne, wenn der Durscht beis Fohrrn künnt. Odder Einbrecher. Jeder Mensch wääs, däss doss a Straftat unn verboode iss. Trotzdem würrd landauf landab eigebroche unn gemobbst. Am End gidd merr aa doo auf, stellt fest, däss jo doch alles nix nützt unn der Schoode oft größer iss wie die Beute. Also stellt merr Schildlich vuur die Haustüre hie unn schreibt zum Beispiel drauf: „Schlüssel liegt auf der Laterne“. Odder off Zettel noo die Baumaschine off verlässe geleechene Baustelle: „Tankdeckel offen, bitte bedienen Sie sich.“ Und: Sogenannte Wildpinkler, also Leut, die irgendwo hie biese, woos nedd erlaubt iss, werrn ömmer widder zur Vernuft aufgfordert und dezu ermahnt, ihr Gschäffd doch bittschön nerr bloß doo zu mache, woos erlaubt iss. Offs Klo! Nützt nix. Wenn die Bloose dröggt, gädds los und s würrd oo Ort unn Stell Erleichterung gschaffe. Also verleecht merr onder a wiederholt benützte Buchshegge unscheinbaor a Dränaasch, schneid die Hegge 190 cm hoch, 50 cm brääd unn 30 cm tief aus unn stellt a freundlichs Schild hie: „Guude Gschäffde!“. Alles Beispiele, wo sich jeder noo n Kopf langt und sich denkt: „Nee! So blöd werrn merr jo wohl nedd senn!“ Unn mit woos hobb ich doss jetzt wohl alles vergliche? In Neuscht hodd mehr johrelang oo die Vernunft vo die Fußgänger abbeliert, von Parkplatz oon Busbahnhof doch bittschön üüwer die Falaiser Brögge unn nedd die vierspurig unn vielbefohren Ströss Richtung Mühlbich/Salz zum Triamare zu genn. Vergeblich! Jetzt kabbiduliert merr vuur der Leut ihr Blödheit, mecht die Ströss brädder unn baut a Querungshilfe nei. Für 124.000 Euro. Servus, der Eustach.

 

 Übersicht 
 
   
© 2008 - 2009 NES-Online.de
(Bad Neustadt
)
Startseite - Aktuelles - Termine - Über uns - Glosse - Gästebuch - Kontakt