| |
Ganz nooch dem Motto „Auch die Sonne hat Flecken“ hobb ich jetzt geleese, däss der berühmt englisch Popstar Phil Collins neulich nochts in sei Hotelzimmer aus sei Bett iss und offs Klo wollt. Er iss gstolpert, offn Stuhl gfalle, hodd sich s Hääd aufgschlooche und musst ins Krankehaus genäht weer. Siehste, hobb ich mir gedocht, muss der Phil Collins nochts also aach scho raus. Kee Wunner. Er iss Johrgang 1951 und scho 66 Johr alt. In dem Alter fängts Laawe frei nooch Udo Jürgens bekanntlich erscht oo, owwer es gedd spätestens dann halt aach domit los, däss merr als Moo nochts mindestens eemol raus muss. Jetzt senn die meiste Männer so rücksichtsvoll, dässe der Fraa zulieb s Licht auslässe, wenn se rausbaamern, weils dröggd. Und schlonn sich nedd selten woss oo, wenn se im Dunkeln irchendwo widd renne. Ganz neue und moderne Hotels senn do jetzt scho so weit, däss, wenn a onnders Bett installierter Bewegungsmelder zwee Füss sidd, automatisch a klenns, unscheiboors Lämple oogädd und den gebloochde nächtliche Klogänger n Waach ausleucht. Hossdes dann unfallfrei offn Klo gschafft, künnt es nächst Problem. Aus Bequemlichkeit odder Sporsamkeit lässe vill Männer nämlich aach ins Kloo s Licht aus. Dässe sich zuss Biese hiesetze, hömmere die Weisbiller beigebrochd, und do funktioniert s Gschäft halt nur, wenn alles so aufgebaut iss, wie üblich. Der Deggel muss oowe und die Brill onnde sei. Und es iss jo höchst erstaunlich, woss mir Mensche bei Bewegungsabläuf, die mir tagtäglich in die gewohnt Umgebung mache, für eine Sicherheit und einen Automatismus entwickeln. A Treppe, die du kennst, künnst du im Stockdunkeln ohne Probleme nauf unn noo. Offn Klo s selwe. Alles tausedmoll gemocht, wässt du genau, wenn beis Hiesetze die Brill künnt. Owwer wehedem, die iss hochgeklappt! Kennt ihr doss Gfühl? Du gässd langsam roo, worrds offn gewohnte Kontakt zwösche Oberschenkelrückseite unn die Brill, owwer die künnt nedd! Iss jo oowe. Do gedds vielleicht ömm zwee Zentimeter, owwer doss scheine Welten zu senn! Du denkst, du fällst ins Bodenlose! Und dann presst sich der eiskalt, schorf Keramikrand vo die Schössel in dei Bee nei unn du bist hellwach! Hodd jeder scho erlebt, owwer merr redd normal jo nedd drüü. Dessweche hob ich jetzt amoll drüü gschriewe. Ihr söllt jo wöss, däss ihr midd euer Brobleme nedd allee seid. Servus, der Eustach. |
